Albisteak

Ziklomotoreen ikuskatze teknikoa egingo da Orion uztailaren 7an eta 21ean

Udaltzaingoak jakinarazten die ziklomotoreak dituzten herritar guztiei aukera izango dutela horien ikuskatze teknikoa (ITV/IAT) egiteko herrian bertan.

Ekainaren 9ko 711/2006 Errege Dekretuaren arabera, 3 urte baino zaharragoko ziklomotoreek (50 z.k. baino gutxiago dituen eta 45 kilometro orduko abiadura gainditzen ez duten bi gurpileko ibilgailuak) Ibilgailuen Ahoskatze Teknikoa (IAT) derrigorrez pasa behar dute.

Eñaut Elorrietaren kantaldia izango da kiroldegian uztailaren 9an

Udalak udan antolatutako kultur agendaren barruan, Eñaut Elorrieta kantari gernikarrak kantaldia emango du Orion uztailaren 9an, ostiralarekin. Kantaldia 19:00etan izango da, Karela kiroldegian.

Ikuskizunerako sarrerak aldez aurretik hartu behar dira, 10 euro ordainduta. Aforo-mugak direla-eta, 220 sarrera baizik ez daude saltzeko eta gaur arratsaldetik aurrera erosi daitezke kultur etxean. Pertsona bakoitzak bi sarrera erosi ditzake, gehienez.

Kultur agenda indartsua antolatu du Udalak uztail-abuztuetarako

Iaz bezala, kultur agenda indartsua antolatu du Udaleko Kultura batzordeak uztail-abuztuetan. Aurten ere festak ospatzeko aukerarik izan ez denez, aurrekontuan horretara bideratuta zeuden diruak kultur ekitaldi seguruetan gastatzea erabaki du Udalak eta agenda indartsu bat antolatu du udan, kultur eskaintza zabal eta erakargarriarekin.

Gaur bertan jarriko dira salgai agendako lehen ekitaldirako sarrerak: Eñaut Elorrietaren kantaldia izango da uztailaren 9an eta gaur arratsaldetik aurrera izango da aukera kultur etxean sarrerak erosteko. Udan zehar antolatuko diren gainerako ekitaldi guztiak doanekoak izango dira. Asko plazan izango dira, Udalak bizitza eman nahi dio-eta herriak irabazi zuen espazio ireki berriari.

Gaur hasiko da martxan Orioko txu-txu trenaren zerbitzua

Atzo probako ibilaldi batzuk egin ondoren, gaur hasiko da martxan Orioko txu-txu trenaren zerbitzua, hondartza eta herrigunea lotzeko. Iaz, COVID-19aren pandemiaren ondorioz, ez zen trenik izan, baina aurten irailaren 12ra arte emango du zerbitzua.

Aldaketa nabarmen bat izango da aurreko urteekin alderatuta: plaza inguruko obrak eragindako norabide-aldaketa dela-eta, segurtasuna bermatzeko, Txu-txu trena ez da Anibarko Portutik pasatuko, eta hondartzatik buelta Arrantzale kalean egingo du, ikastola parean.

Prestakuntza-ikastaroak antolatu ditu Udal Elkarteak merkataritza sektoreko profesionalentzat

Uztailean hasi eta abendura bitartean, merkatarientzako eta zerbitzu enpresentzako hainbat prestakuntza-ikastaro emango ditu Urola Kostako Udal Elkarteak.

Ikastaroen helburua da eskualdeko merkataritza eta zerbitzuen alorreko enpresei beren negozioen lehiakortasuna hobetzen laguntzea, bereziki digitalizazio alorreko ikastaroak eskainiz.

Uztailean bi prestakuntza-ikastaro emango dira, biak aurrez aurrekoak. Urola Kostako Udal Elkartearen egoitzan izango dira eta bakoitza bi orduko bi saioz osatuko da. 14:00etatik 16:00etara bitartean emango dira.

Gipuzkoako Itzulia Oriotik pasatuko da igande arratsaldean

Datorren igandean, ekainak 27, Gipuzkoako Itzuliaren 31. edizioaren 2. etapa pasatuko da Oriotik, 17:00ak aldera.

Aginagatik barrena etorriko da Oriora eta Aia aldera joko du gero, Xuai gainetik barrena.

N-634 errepidea 16:30 inguruan itxiko da zirkulaziorako eta lasterketa pasatu eta segituan irekiko da ostera.