Albisteak

Zinea izango da ikastola aurreko plazan uztailaren 27an: Urrezko Iparrorratza

Uztailaren 27an, larunbatarekin, zine-emanaldia izango da ikastola aurreko plazan, 22:00etan hasita, udako kultur programazioaren barruan. 'Urrezko Iparrorratza' filma eskainiko da, euskaraz.

Udalak lau film programatu ditu aurtengo udan eta hau izango da bigarrena.

Sarrera doan izango da.

Eguraldi txarra egiten badu, zine-emanaldia Herriko Plazan egingo da.

Aldaketa plazaren peatonalizazioan, asteburu honetan hasita

Jakina denez, Herriko Plaza peatonalizatu egiten da asteburuetan, larunbateko 14:00etatik igandeko 20:30ak arte.

Udaleko Obra eta Zerbitzuetako batzordeak erabaki berri du epe hori luzatzea eta, udako hilabete hauetan, plaza peatonalizatuta egotea astelehen goizeko 07:30ak arte.

Oinezkoen segurtasuna bermatzeko

Erabakia hartzeko arrazoia hau izan da: plazan dabiltzan oinezkoen artean tarteka sortzen den zalantza eta nahaspila ebitatzea eta beren segurtasuna bermatzea. Uda honetan, zorionez, errezibimendu asko egiten ari gara igande iluntzetan eta ordu-garai horretan plaza bete-beteta izaten da maiz. Udalak uste du peatonalizazioa hurrengo goizera arte luzatuta seguruago ibili ahal izango direla herritarrak.

Neurri hori asteburu honetan bertan jarriko da indarrean eta hala segituko du irailaren 9ra arte, Kontxako estropadaren bigarren igandera arte.

Orioko Eguneko Zentroak 15 urte bete ditu

Gaurko egunez bete dira 15 urte Orioko Eguneko Zentroa ireki zela eta ekitaldi xume bat egin dute bertan, urteurrena ospatzeko.

15 urteotan makina bat familiari eman dio zerbitzua Eguneko Zentroak eta egindako ibilbide hori ekarri dute gogora gaurko ekitaldian. Bertan izan dira zentroko langile eta erabiltzaileak eta Udaleko alderdi guztietako ordezkariak.

Urola Kostako Udal Elkarteak dirulaguntza deialdia egin du, eskualdeko enpresentzat

Urola Kostako Udal Elkarteak, Lanbide-Euskal Enplegu Zerbitzuaren laguntzarekin, dirulaguntzen deialdia egin du enplegua sustatzeko 2019ko planaren barruan.

Dirulaguntzen deialdia eskualdeko enpresei zuzentzen zaie, langabeak kontratatzeko. Guztira, 214.500,00 euro emango dira dirulaguntzatan. Eskabideak aurkezteko epea irailaren 20an bukatuko da.

Deialdiaren oinarriak eta eskabidea aurkezteko eredua Udal Elkartearen webgunean daude:

• Informazio gehiago
• Oinarriak eta eskabide-ereduak

Orio Kanpina banderak jokatuko dira asteburuan, itsasoan

Bi egunetan izango dira estropadak:

• Larunbatean, uztailak 20, Orioko 29. estropadak jokatuko dira. Euskotren ligako estropada jokatuko dute neskek, 18:00etan hasita: 7. ORIO KANPINA bandera. Ondoren, 18:30ean, Eusko Label ligako estropada jokatuko dute mutilek: ORIOKO 29. ESTROPADAK. 7. ORIO KANPINA bandera.
• Igandean, berriz, uztailak 21, nesken ETE ligako eta mutilen KAE2 ligako estropadak jokatuko dira arratsaldez, 18:00etan hasita.

Pantaila erraldoia plazan

Larunbatean aisialdi-gune bana instalatuko da Herriko Plazan eta errioaren bestaldeko espigoiaren inguruan. Gune horietan Eusko Labeleko produktuak jateko eta edateko aukera izango dute bertaratzen direnek eta, horrez gain, pantaila erraldoia jarriko da plazan, estropada bertan ikusi ahal izateko. Guneetan babesleen postuak ere izango dira.

Gure Zirkua Orion izango da abuztuaren 1etik 18ra

Orioko Udalak antolatutako udako ekitaldi-programaren barruan, guztira 17 emanaldi egingo ditu Gure Zirkuak Orion: asteazken, ostegun, ostiral eta igandetan, bana, 19:00etan; eta larunbatetan, berriz, bina emanaldi: 18:00etan bat eta 20:30ean bestea.

Gure Zirkuaren karpa Mendibeltz futbol eta sofbol zelaiaren ondoan instalatuko da, berdegunean.