Albisteak

Nekazaritzako ibilgailuen azterketa teknikoa azaroaren 5ean egingo da, Arraunetxen

Alarma-egoera dela eta, ezinezkoa izan da nekazaritzako ibilgailuen azterketa teknikoaren (IAT/ITV) kanpaina ohiko egunetan egitea, eta horretaz arduratzen den Unitate Mugikorra azaroaren 5ean izango da Orion, goizeko 09:00etatik aurrera. Azterketa Arraunetxen egingo da.

Bergarako IAT tailerreko unitate mugikorra etorriko da Oriora egun horretan.

N-634 errepidea moztuko da Orion urriaren 20an, Espainiako itzuliagatik

Espainiako Itzuliaren lehenbiziko etapa urriaren 20an jokatuko da Irundik Arratera.

Oriotik 14:00ak aldera pasatuko dela aurreikusten dute antolatzaileek eta, beraz, N-634 errepidea itxita izango da 13:00etatik 15:00etara. Lasterketaren martxaren arabera, baliteke lehentxeago ireki ahal izatea, baina ez da segurua.

Mikel Urdangarinek kantaldia emango du kiroldegian azaroaren 14an

Mikel Urdangarin abeslari zornotzarraren kantaldia izango da Orion azaroaren 14an, larunbatarekin. Kantaldia 22:00etan izango da, Karela kiroldegian.

Kantaldirako sarrerak aldez aurretik hartu behar dira, 10 euro ordainduta. Aforo-mugak direla-eta, 260 sarrera baizik ez daude saltzeko eta dagoeneko erosi daitezke kultur etxean. Pertsona bakoitzak bi sarrera erosi ditzake, gehienez.

«Errimak bi oinetan» dantza-ikuskizuna izango da kiroldegian urriaren 30ean

Haatik dantza-konpainiak dantza eta bertsoak uztartzen dituen emanaldia eskainiko du Orion urriaren 30ean, ostiralarekin. Ikuskizuna 22:00etan izango da, Karela kiroldegian.

Ikuskizunerako sarrerak aldez aurretik hartu behar dira, 5 euro ordainduta. Aforo-mugak direla-eta, 260 sarrera daude saltzeko eta dagoeneko erosi daitezke kultur etxean. Pertsona bakoitzak bi sarrera erosi ditzake, gehienez.

45 urtetik gorako herritarrak lan-munduan txertatzen: «45 + Indartzen» egitasmoa

Egunotan abiatu da Urola Kostako Udal Elkarteak antolatzen duen «45 + Indartzen» egitasmoa eta zabalik dago izena emateko epea, azaroaren 12ra arte

Aurtengoa egitasmoaren bigarren edizioa da. Urola Kostako Udal Elkarteko Enplegu eta Orientazio Zerbitzuak antolatzen du, KONPETENTZIEN ESKOLA zerbitzuaren barruan. Iaz egin zen egitasmoaren lehen edizioa (ikusi parte-hartzaileak, argazkian) eta, emaitza onak izan zituela ikusita, berriro antolatu dute 2020ko azken hiruhilekoari begira.

Leire Zinkunegik «Itsaspeko ipuinak» kontatuko ditu asteartean kultur etxean

Datorren urriaren 20an, asteartearekin, Leire Zinkunegi ipuin-kontalari oriotarrak «Itsaspeko ipuinak» izeneko saioa emango du kultur etxean, 18:00etan hasita.

Ipuin-kontaketa saioa 5 eta 8 urte arteko haurrentzat prestatu du Leirek eta bertan itsasoarekin lotutako ipuinak kontatuko ditu.

Gonbita hartu behar da, aldez aurretik

COVID-19aren pandemiak sortutako egoerak behartua, ekitaldiak 30 laguneko aforo mugatua izango du eta, hori dela eta, bertaratu nahi dutenek gonbita jaso beharko dute aldez aurretik kultur etxean bertan.