Mar26

19:00

Jon Gurrutxaga eta Urbil Artolaren kontzertua izango da Arraunetxen martxoaren 26an

Lekua: Arraunetxe

Antolatzailea: Orioko Udala

Traducción automática al castellano

Jon Gurrtxaga eta Urbil Artola musikariek kontzertua emango dute Orion martxoaren 26an, ostiralarekin, «Kateak» diskoa aurkezteko. Ekitaldia 19:00etan izango da, Arraunetxeko aretoan.

Kontzertua urtarrilaren 29an egitekoa zen, baina bertan behera geratu zen Orioko pandemia-egoerak okerrera egin zuenean, Udalak bere instalazio guztiak ixtea erabaki baitzuen.

Kontzerturako sarrerak aldez aurretik erosi behar dira, 2 euro ordainduta. Lehendik erosita dutenek ez dute berriro erosi behar eta bere garaian erositakoa baliatu dezakete kontzertura sartzeko. Norbaitek sarrera erosi bazuen eta orain joaterik ez badu, kultur etxera jo dezake eta ordaindutako dirua itzultzea eskatu.

Aforo-mugak direla-eta, 70 sarrera daude saltzeko eta astelehenetik aurrera erosi ahal izango dira kultur etxean. Pertsona bakoitzak bi sarrera erosi ditzake, gehienez.

Gaztelupeko Hotsak diskoetxeak argitaratu du «Kateak» diskoa. Gospela, bluesa, folka eta pop-­rockaren eragina modu oso pertsonalean azaleratu du Gurrutxagak lan berrian eta, zuzeneko emanaldietan, Urbil Artolararekin batera ari da jotzen.

Jon Gurrutxaga

Jon Gurrutxaga elgoibartarrak Arima Beltza taldearekin hasi zuen musika-ibilbidea, bateria jotzen eta abesten. Blues&Rock doinuak landu zituzten batez ere. Ondoren, Keu Agirretxearen UEK proiektuan aritu zen, baterian, eta baita Andrakan taldean ere. Jon & Sugramas izeneko proiektuarekin itzuli zen oholtzetara, berak konposatutako kantuekin. «Hitz lauz» izan zen bere izen propioarekin argitaratutako estreinako diskoa, akustikoa eta intimoagoa.

Urbil Artola

Urbil Artola hondarribiarrak, berriz, Sorotan Bele taldearekin hasi zuen musika-ibilbidea. Folka eta doinu erakargarriak uztartuz, arrakasta handia lortu zuen taldeak eta hiru disko kaleratu zituen.

Taldea desegin ondoren, gitarra akustikoa jotzetik dobroa jotzera pasa zen Urbil Artola eta, azken urteotan, Howdy Bluegrass taldeko partaide da eta hainbat bakarlarirekin grabatu eta jo du: Anje Duhalde, Iker Lauroba, Maider Zabalegi…