elhuyar itzaultzaile automatikoaren logoa Itzulpen
automatikoa:
ES FR EN CA GL

Haurreskolako matrikulazio epea apirilaren 11n irekiko dute

Haurreskolen partzuergoak haurren izen-emateko modua aldatu du datorren ikasturtera begira, eta orain arte bezala hiru alditan egiteko partez, deialdi bakarra izango da aurrerantzean. Datorren ikasturtera begirako matrikula egiteko epea, hain zuzen, apirilaren 11tik maiatzaren 9ra izango da zabalik, biak barne.

Apiriletik ekainera arteko kultur programa aurkeztu du Udalak

Anuska Esnal Orioko alkateak, Xabi Ibarguren kultur zinegotziak eta Iker Apaolaza kultur teknikariak gaur, martxoak 31, aurkeztu dute apiriletik ekainera arteko Orioko kultur programa. Ibargurenek nabarmendu duenez, «Adin, gustu eta zaletasun guztiei zuzendutako aukerak bildu nahi izan ditugu, ikus-entzunezko hainbat formatutan». Aurreneko aldiz, programaren euskarri fisikoa banatuko da etxez etxe, eta ekitaldien inguruko informazio guztia Udalaren webguneko Agenda atalean izango da eskuragarri bihartik aurrera.

Erregistroen Interkonexio Sistema (EIS) ezarri du Udalak

Administrazio publikoen artean erregistro eta idatzi elektronikoak trukatzeko oinarrizko azpiegitura da EIS (gaztelaniazko sigletatik ezagunagoa: SIR). Orioko Udalak ezarri berri du sistema eta, horren bidez, estatuko administrazio publikoekin dokumentuak formatu elektronikoan konpartitzeko aukera du, segurtasun- eta lege-berme guztiak beteta.

Herriko artisten parte-hartzea sustatu nahi du Udalak aurtengo artisau-azokan

Maiatzaren 8an, igandearekin, artisau-azoka izango da herrian. Dagoeneko dozena bat eskulangilek eman dute izena bertan izateko, eta Udalak deialdia egin du herriko sortzaileen parte-hartzea sustatzeko eta haien lanak ezagutarazteko.

Apirilaren 8ko goizaldean pasatuko da Korrika Oriotik, Aginagara bidean

Korrikaren 22. edizioa ostegun honetan, martxoak 31, jarriko da martxan eta, hamar egunez, Euskal Herri osoa korrituko du. Amurrion abiatu eta Donostian bukatuko da, apirilaren 10ean.

Korrikak 10 kilometro egingo ditu Orion, Xuai gainetik Aginagako Mapileraino. Apirilaren 8ko goizeko 05:00ak inguruan iritsiko da Korrika Xuai gainera eta han hartuko diete oriotarrek lekukoa zarauztarrei. Herriko talde eta elkarte hauek eramango dute lekukoa Orioko ibilbidean:

Oriok bat egin du medikamentuen erabilera hobetzeko Osasun Sailaren programarekin

Eusko Jaurlaritzako Osasun Sailak, Orioko Udalak eta Gipuzkoako Sendagaigileen Elkarteak lankidetza-hitzarmena sinatu dute gaur goizean udaletxean. Iñaki Betolaza Eusko Jaurlaritzako Farmaziako zuzendariak, Anuska Esnal Orioko alkateak eta Arantxa Garcia Peinado Gipuzkoako Sendagaigileen Elkarteko presidenteordeak hartu dute parte ekitaldian.

Udalbatzarrak ohiko bilkura egingo du ostegunean, martxoak 31

Bilkura udalbatzarraren aretoan egingo da, udaletxean. 19:30ean hasiko da, eta gai hauek aztertuko dira:

Ordenantza berriak baimenduta, Orioko erretegiek aukera dute terrazan egitura erdi-finkoak jartzeko

Udalak azken urteetan egindako gogoetaren eta lanketaren emaitzak biltzen ditu urte hasieran jendaurrean aurkeztu zen Biziberritze Planak. Bertan, herriko parrillak Orioren nortasun-ikurtzat hartzen dira. Horregatik, herrian geratzen diren azken parrillak babesteko eta jarduera hori berreskuratzeko, terrazen ordenantza berriak baimena eman die erretegiei terrazan egitura erdi-finkoak jartzeko.

«Alpistegia» haurrentzako bertso- eta antzerki-saioa, apirilaren 8an Orion

Korrika Kulturalaren programaren baitan, bertsoa eta antzerkia uztartzen dituen haurrentzako Alpistegia ikuskizuna antolatu du Udalak apirilaren 8an, ostiralarekin, 18:00etan kultur etxean. Sarrerak eskuragai daude online eta kultur etxean bertan, 2 euroan.

Orioko bost emakume ekintzailerekin mahai-ingurua antolatu du Ahalduntze Eskolak

Martxorako prestatutako programa oparoa agurtu eta hilabete berriari ongietorria egiteko, Orioko Ahalduntze Eskolak saio berezia prestatu du ostiralerako, apirilak 1: herriko bost emakume ekintzailerekin mahai-ingurua. Salatxo aretoan izango da, 18:00etan hasita, eta ostean, M8aren inguruan antolatutako argazki-lehiaketaren sari-banaketa egingo dute.

«Errioa, gure nortasuna» hitzaldi-sortaren bigarren saioa egingo dute asteazkenean

Martxoko azken asteazkenean, hilak 30, Orioko itsas ondareari buruzko bigarren hitzaldia antolatu du Udalak. Iosu Etxezarraga Historian doktoreak Pizkunde garaiko Orio izango du aztergai 19:00etatik aurrera, Arraunetxen. Saioa doakoa izango da.

Heriotza duinari buruzko hitzaldia emango du gaur Iñaki Peña sendagileak, Arraunetxen

Gaur, martxoak 28, Iñaki Peña Bandrés sendagile eta dolu-prozesuan adituak hitzaldia emango du Arraunetxen, 19:00etan hasita. Bihotzetik elkarteren eskutik, heriotza duina izango du hizpide, eta gaian interesa duten herritar guztiei zabaldutako saioa izango da.