elhuyar itzaultzaile automatikoaren logoa Itzulpen
automatikoa:
ES FR EN CA GL

Ahalduntze Eskolak antolatuta, atzerritartasunari buruzko bilera informatiboa egingo dute martxoaren 21ean

Ahalduntze Eskolak Atzerritartasunari buruzko bilera informatiboa antolatu du martxoaren 21ean, astelehenarekin. 17:00etan izango da, Salatxo aretoan, eta Eusko Jaurlaritzari atxikita dagoen Biltzen zerbitzuko arduradunek gidatuko dute. Deialdia emakume etorkinei zuzenduta dago.

Zinegoak jaialdiaren lagin bat Orion izango da ikusgai

Ahalduntze Eskolaren martxoko programazioaren baitan, Zinegoak Bilboko Gaylesbitrans 19. Nazioarteko Zinema eta Arte Eszenikoen Jaialdiko hainbat lan proiektatuko dituzte Orion. Emanaldia martxoaren 18an, ostiralarekin, egingo dute kultur etxean, 19:00etan hasita. Eta sarrerak eskuragai daude 3 euroan, kultur etxean.

Danbolin Musika Eskolako ikasleen martxoko emanaldiak

Danbolin Musika Eskolako ikasleek hainbat ekitaldi eskainiko dituzte martxoan, bigarren hiruhilekoari amaiera emateko. Larunbatean, martxoak 19, hasiko dute programazioa Karela kiroldegian egingo duten dantza emanaldiarekin, eta martxoaren 31ra arte, dozenatik gora entzunaldi eskainiko dituzte.

Udaltzaingoaren bulego berria egokitzen ari da Udala

Herriko Plazan, udaletxearen eraikinaren kanpoaldean, dagoen Udaltzaingoaren bulegoa Eusko Gudari kaleko 54. zenbakira lekualdatuko du Udalak. Urte askoan Indar Gym gimnasioaren egoitza izan zen eta 20 urtez itxita egon den lokala egokitzen ari da orain Udala, eta Udaltzaingoaren bulego berria epe laburrean martxan izatea aurreikusi dute.

Kultur-jardueretarako dirulaguntzak eskatzeko epea zabaldu du Udalak

Herriko kultur elkarteei zuzenduta, urteko dirulaguntzak eskatzeko epea zabaldu du Udalak. Gaur kaleratu da deialdia, eta hilabeteko epea izango da eskatutako dokumentuak aurkezteko, 2022ko apirilaren 19ra arte.

Bertso-jaialdia izango da Karelan, Korrika kulturalaren barruan

San Nikolas jaiak bertan behera gelditu bezain pronto adostu zuten Orioko Udalak eta Errikotxia bertsozaleen elkarteak ohiko bertso-jaialdia negu amaieran edo udaberrian egitea. Azkenean, Korrika kulturalaren barruan kokatu dute antolatzaileek: martxoaren 27an izango da, igandearekin, Karelan kiroldegian, 18:00etan.

Kultur-mahaiak berraktibatzeko bilera irekia egingo dute martxoaren 16an

Orioko Udalak 2013tik bildu ez den Kultur Mahaia berraktibatu nahi du, eta horretarako, Kultura sailak bilera irekia deitu du martxoaren 16an, asteazkenarekin. 19:30ean hasiko da saioa kultur etxean, eta herriko kultur talde eta eragileei luzatu diete bertan parte hartzeko gonbita.

Miriam Mendoza ipuin-kontalariaren saioa, martxoaren 21ean

Martxoko kultur programaren barruan, Miriam Mendoza ipuin-kontalariak saioa eskainiko du hilaren 21ean, astelehenarekin. 3 eta 6 urte arteko haurrei zuzendutako ekitaldia izango da, kultur etxeko areto nagusian, 17:30ean hasita.

Bihar goizean irtengo da Ukrainarantz oriotarren laguntza daraman trailerra

Ukrainako gerrako biktimentzako laguntza jasotzeko herrian egindako deialdiak oso erantzun ona izan du, eta bihar goizean irtengo da Oriotik azken bi asteetan bildutako janaria, arropa eta sendagaiak Ukrainara eramango dituen trailerra. Udalak txalotu egin nahi du ekimena sustatu duen elkartearen eta herritarren lana.

Gipuzkoa Dance Contest jaialdia izango da asteburuan Karela kiroldegian

Warda Mallal Dantza Estudioak antolatuta, Gipuzkoa Dance Contest Hip Hop txapelketaren 10. ekitaldia egingo dute igandean, martxoak 13, Orioko Karela kiroldegian. Goizeko 10:45ean zabalduko dituzte ateak, eta egun osoz, 800 dantzari inguru elkartuko ditu ekitaldiak. Arratsaldeko emanaldietarako sarrerak eskuragai daude oraindik, 637 256 851 zenbakian.

Ahalduntze Eskolaren urteko jarduna bermatzeko hitzarmena sinatu dute Udalak eta Pertzetik elkarte feministak

Gaur, martxoaren 10ean, hitzarmena sinatu dute Orioko Udalak eta Ahalduntze Eskolaren kudeaketaz arduratzen den Pertzetik elkarte feministak. Berdintasunezko politikak gauzatzeko eta gizarte inklusiboa eraikitzen jarraitzeko konpromisoa berretsi du horrela Udalak.

Danbolin Musika Eskolako Martin Daly ikasleak Euskadiko Musikari Gazteen Lehiaketan parte hartuko du

Martxoaren 18tik 20ra egingo dute, Gasteizen, Euskadiko Musikari Gazteen XV. Lehiaketa, eta tekladun instrumentuen kategorian, bakarlari moduan, parte hartuko duten hamazazpi gazteen artean izango da Orioko Danbolin Musika Eskolako ikasle Martin Daly.