Noticias

Galiboa jarri du Udalak, baina moilako zirkulazio-aldaketa ez da egingo, azkenean, datorren astera arte

Udalak gaur zuen asmoa plaza inguruko zirkulazioa aldatzeko eta moilako bidea bi noranzkotan jartzeko, baina, eguraldia dela-eta, atzeratu egin du datorren astera arte.

Gaur goizean pintatzekoak ziren lurreko marrak, arratsaldean zirkulazio-aldaketa egiteko, baina, euria dela-eta, ezin izan dituzte pintatu. Datozen egunotan ere eguraldi euritsua dago iragarrita eta, beraz, Udalak datorren artera atzeratu ditu pintaketa-lanak.

Galiboa jarrita

Nolanahi ere, galiboa jarrita dago dagoeneko eta, beraz, 2,40 m-tik gorako altuera duten ibilgailuek Txanka-Hondartzako bidea erabili beharko dute aurrerantzean, herritik ateratzeko. Galiboa instalatuta dagoela adierazten duten seinaleak jarri ditu Udalak goizean herriko hainbat tokitan, gidariak jakinaren gainean izateko (ikusi irudia).

Hanburgoko NDR Elbphilharmonie Orchestraren kontzertua izango da azaroaren 12an Kursaalean, eta autobusa izango da doan Oriotik joan nahi dutenentzat

Donostiako Kursaalean Hanburgoko NDR Elbphilharmonie Orchestrak kontzertua emango du hurrengo asteartean, azaroak 12, 20:00etan hasita.

Beste hainbatetan bezala, autobusa antolatu da doan Urola Kostako eskualdetik joan nahi dutenentzat. Autobusa Zumaiatik abiatuko da eta Oriotik ere pasatuko da.

Nork bere sarrera erosi behar du

Kontzertura joan nahi dutenek beren kasa erosi behar dute sarrera Kursaalaren webgunean:

https://www.kursaal.eus/eu/

Sarrerak hainbat preziotan erosi daitezke, tokiaren arabera.

Herrio natur taldeak haziak banatuko ditu azaroaren 10ean, igandearekin

Urteroko ohiturari jarraituz, Herrio natur taldeak Euskal Herriko zuhaitzen haziak banatuko ditu azaroaren 10ean. Herriko Plaza obratan denez, Zakilaneko aldaparen hasieran jarriko dute mahaia 11:00etan eta bertan izango dira 13:30ak arte.

Ekimen horren bitartez, Herrio taldeak herritarrak sentsibilizatu nahi ditu bertako zuhaitz espezieak zaintzearen garrantziaz.

Banaketaren helburua da herritarrek zuhaitz-hazi horiek etxean ereitea eta, landaretxoa sortzen denean, kanpoan landatzea, toki egoki batean.

Euskal Herriko zuhaitzen haziak dira Herriokoek banatuko dituztenak: lizarra, gaztaina, artea, haritza, elorri zuria, gorostia, astigarra…

Datorren asteartean aldatuko da zirkulazioa moilan eta bi noranzkotan pasatuko dira autoak

Azaroaren 5eko arratsaldean egingo da aldaketa: galiboa jarriko du Udalak moilan, The Pass dendaren eta Bizkarreneko etxearen artean. 2,40 m-tik gorako altuera duten ibilgailuek ezin izango dute galibo azpitik pasatu eta, beraz, Txanka-Hondartzako bidea erabili beharko dute herritik ateratzeko.

Herriko irteera Diketik barrena

Galiboa jartzen denetik aurrera, herriko sarrera Txistulari kaletik izango da, azken asteotan bezala, baina irteera Diketik barrena egin beharko dute bai autoek eta bai 2,40 m-tik beherako altuera duten gainerako ibilgailuek.

Behin plazako obrak bukatzen direnean, hori izango da herritik ateratzeko bide nagusia, eta 2,40 m-tik gorako ibilgailuek, nahitaez, Txanka-Hondartzako bidea erabili beharko dute.

Miriam Mendoza ipuin-kontalaria izango da astelehenean kultur etxean

Liburutegiak aldian behin antolatzen dituen ipuin-kontaketa saioetako bat izango da datorren astelehenean, azaroak 4, 18:00etan hasita.

Ipuinak kontatzen Miriam Mendoza kontalaria arituko da. Orioko haurrek ezagutzen dute Miriam, lehenago ere etorri izan delako liburutegira.

Saioa kultur etxeko areto nagusian egingo da eta 3 eta 6 urte arteko haurrentzat eta gurasoentzat da.

Datorren astean desmuntatuko dute plazako kioskoa

Herriko Plazako obren barruan, kioskoa desmuntatzen hasiko dira datorren astean.

Udalak berriro instalatuko du gero kioskoa, behin plazako obrak aurreratu eta gero (ikusi planoa). Orain desmuntatuko den kioskoaren pieza ahalik eta gehien erabiliko ditu horretarako: zutabeak, arkuak… Ezinezkoa izango da pieza guztiak berrerabiltzea, baina gehienak, bai.