Noticias
Hondakinak biltzeko zerbitzua berrantolatuko du Urola Kostako Udal Elkarteak
Gaikako bilketa hobetzeko helburua du berrantolaketak. Urola Kostako Udal Elkarteak birziklapen-tasa hobetu nahi du, batetik, eta, bestetik, edukiontzi-guneen txukuntasuna areagotu. «Herriz herri eskualdeko etxebizitza, komertzio, zerbitzu eta industrietan sortutako etxeko hondakinak biltzeko zerbitzuaren egoera aztertzea dugu helburu, optimizazio-pausuak ematen jarraitzeko» adierazi du Lourdes Salsamendi Urola Kostako Udal Elkarteko presidenteak.
Hondakinen 2018/851 Europako Zuzentarauak eta hondakinen lege-aurreproiektuak, Diputatuen Kongresuan izapidetzen ari direnak, gaikako bilketaren %60ko helburua ezartzen dute 2030erako. «2019ko datuen arabera, egun Urola Kostan %70,02an gaude —azaldu du Salsamendik—. Urtez urte ehuneko hori handitzen doa, baina salto kualitatibo bat eman nahi dugu, eta hori herritarrekin batera egin behar dugu. Berrantolaketa honekin herritarrak kontzientziatu nahi ditugu, hondakinak hobeto kudeatzeko».
Nekazaritzako ibilgailuen azterketa teknikoa azaroaren 5ean egingo da, Arraunetxen
Alarma-egoera dela eta, ezinezkoa izan da nekazaritzako ibilgailuen azterketa teknikoaren (IAT/ITV) kanpaina ohiko egunetan egitea, eta horretaz arduratzen den Unitate Mugikorra azaroaren 5ean izango da Orion, goizeko 09:00etatik aurrera. Azterketa Arraunetxen egingo da.
Bergarako IAT tailerreko unitate mugikorra etorriko da Oriora egun horretan.
N-634 errepidea moztuko da Orion urriaren 20an, Espainiako itzuliagatik
Espainiako Itzuliaren lehenbiziko etapa urriaren 20an jokatuko da Irundik Arratera.
Oriotik 14:00ak aldera pasatuko dela aurreikusten dute antolatzaileek eta, beraz, N-634 errepidea itxita izango da 13:00etatik 15:00etara. Lasterketaren martxaren arabera, baliteke lehentxeago ireki ahal izatea, baina ez da segurua.
Mikel Urdangarinek kantaldia emango du kiroldegian azaroaren 14an
Mikel Urdangarin abeslari zornotzarraren kantaldia izango da Orion azaroaren 14an, larunbatarekin. Kantaldia 22:00etan izango da, Karela kiroldegian.
Kantaldirako sarrerak aldez aurretik hartu behar dira, 10 euro ordainduta. Aforo-mugak direla-eta, 260 sarrera baizik ez daude saltzeko eta dagoeneko erosi daitezke kultur etxean. Pertsona bakoitzak bi sarrera erosi ditzake, gehienez.
«Errimak bi oinetan» dantza-ikuskizuna izango da kiroldegian urriaren 30ean
Haatik dantza-konpainiak dantza eta bertsoak uztartzen dituen emanaldia eskainiko du Orion urriaren 30ean, ostiralarekin. Ikuskizuna 22:00etan izango da, Karela kiroldegian.
Ikuskizunerako sarrerak aldez aurretik hartu behar dira, 5 euro ordainduta. Aforo-mugak direla-eta, 260 sarrera daude saltzeko eta dagoeneko erosi daitezke kultur etxean. Pertsona bakoitzak bi sarrera erosi ditzake, gehienez.
45 urtetik gorako herritarrak lan-munduan txertatzen: «45 + Indartzen» egitasmoa
Egunotan abiatu da Urola Kostako Udal Elkarteak antolatzen duen «45 + Indartzen» egitasmoa eta zabalik dago izena emateko epea, azaroaren 12ra arte
Aurtengoa egitasmoaren bigarren edizioa da. Urola Kostako Udal Elkarteko Enplegu eta Orientazio Zerbitzuak antolatzen du, KONPETENTZIEN ESKOLA zerbitzuaren barruan. Iaz egin zen egitasmoaren lehen edizioa (ikusi parte-hartzaileak, argazkian) eta, emaitza onak izan zituela ikusita, berriro antolatu dute 2020ko azken hiruhilekoari begira.
