Noticias

Lurgaia fundazioak hitzaldia emango du larunbatean, gure basoak berreskuratzeko egiten duten lana azaltzeko

Apirilaren 24an izango da hitzaldia, larunbatarekin, 18:30ean hasita, Arraunetxeko goiko aretoan.

Lurgaia fundazioak urteak daramatza Euskal Herriko basoak berreskuratzeko lan egiten eta, lan horren berri emango dute Herrio natur taldeak antolatu duen hitzaldian.

Bertaratu ezin dutenek aukera izango dute hitzaldia internet bidez ikusteko, helbide honetan:

https://meet.google.com/nxi-rwnj-ymh

Konexioa wifi bitartez izango denez, jende asko konektatzen bada, baliteke etenak eta arazoak izatea. Horregatik, badaezpada ere, Herrio natur taldeak grabatu egingo du saioa eta gero online ikusteko aukera ere izango da.

Orioko udal-langileek bat egin dute sindikatuek biharko deitu duten grebarekin

Apirilaren 22an greba deitu dute Euskal Herriko sindikatu nagusiek (ELA, LAB, CCOO, SATSE, Steilas eta ESK-k), hiru eskari nagusi hauek egiteko:

• Zerbitzu publikoak defendatzea
• Enplegu publikoa sortzea
• Behin-behineko lanpostuak kontsolidatzea

Greba orokorra EAEko sektore publiko osoan deitu dute sindikatuek bihar ostegunerako, apirilak 22.

Udal-eraikinak itxita

Orioko udal-langileek, batzarrean bilduta, greba orokorrarekin bat egitea erabaki zuten astelehenean eta, beraz, bihar itxita egongo dira udaletxea, kultur etxea, musika-eskola eta, orokorrean, udal-langileek irekitzen dituzten udal-eraikin guztiak.

Udalak bat egin du sindikatuen eskariekin. Beraz, Orioko Udalak legeak ezarritako zerbitzu minimoak baizik ez ditu emango eta, esan bezala, aipatutako udal-eraikinak itxita izango dira egun osoan.

Bertan behera geratu da Miriam Mendoza ipuin-kontalariaren asteleheneko saioa

Miriam Mendozak ipuin-kontaketa saio bat eman behar zuen datorren astelehenean, apirilak 26, Orioko kultur etxean, baina bertan behera geratu da saioa, kontalaria konfinatuta dagoelako.

Udala saiatuko da emanaldia ahalik eta azkarren berriro antolatzen.

Barkatu eragozpenak.

Miriam Mendoza ipuin-kontalaria izango da apirilaren 26an kultur etxean

Liburutegiak hilero antolatzen dituen ipuin-kontaketa saioetako bat izango da apirilaren 26an, 17:30ean hasita.

Miriam Mendoza ipuin-kontalariak emango du saioa. Miriam ezaguna da Orioko haurrentzat, lehenago ere askotan etorri izan da-eta liburutegira.

Maria Rivero eta Tribu Bandaren kontzertua izango da Arraunetxen apirilaren 30ean

Maria Rivero abeslariak kontzertua emango du Orion apirilaren 30ean, ostiralarekin, Tribu Banda taldeak lagunduta. Ekitaldia 19:00etan izango da, Arraunetxeko aretoan.

Kontzerturako sarrerak aldez aurretik hartu behar dira, 2 euro ordainduta. Aforo-mugak direla-eta, 70 sarrera daude saltzeko eta astelehen arratsaldetik aurrera erosi ahal izango dira kultur etxean. Pertsona bakoitzak bi sarrera erosi ditzake, gehienez.

Maria Riverok aurten argitaratu du «Parentesiak» disko berria eta horren aurkezpena egingo du Orioko kontzertuan.

Saio informatibo bat antolatu du Udal Elkarteak 45+ INDARTZEN programari buruz

«45+Indartzen» programari buruzko saio informatiboa apirilaren 14an egingo da, asteazkenarekin, 11:00etan. Saioa online egingo da gotomeeting plataformaren bidez. Saio informatiboan parte hartzeko, aurrez izena eman beharko da galdetegi hau beteta. Ondoren, saiora sartzeko esteka jasoko du interesdunak bere posta elektronikoan.

Laster hasiko da «45+Indartzen» ekimenaren 4. edizioa. 40 orduko prestakuntza-programa da, 45 urtetik gorako herritarrak lan-munduan txertatzeko. Programan izena emateko epea zabalik dago eta apirilaren 21ean bukatuko da.